...Jak zrez na drevie, nabryniały sokam Ciažkim, što kroŭ... «Moj jasny sokał! Moj vysoki sokał!» A hałuby laciełi z rukavoŭ, I zichaciełi pacałunki ŭ dziubach – Piarścionki załatyja vusnaŭ lubych. Nakormleny – bryvom nie zvaruchnuć! Na śpiny hałubiatniki vałiłisia... A ja nia moh biazbojazna dychnuć Pavietram tym, što la ciabie śviaciłasia. Toj doždž, što pyrskaŭ u tvaju dałoń, Ja piŭ nabožna, jak vadu śviatuju, I jak pahancy vieryłi ŭ ahoń, Pavieryŭ ciomna ŭ navalnicu tuju, Kałi z-za chmar, by ŭ miednaje viadro, Hramy špurlałi za jadrom jadro, I my ŭdvaich łaviłi ŭratavana Małanki aślaplalnaje piaro, Błiskučy mieč Izoldy i Trystana! – ...Dyk što ž toj mieč? – Stupieŭ va ŭžytku chatnim... – A hałuby?.. – Žyvuć na hałubiatni.
|
|